Кӯлоб: Семинари омӯзишӣ оид ба муқовимат ба савдои одамон

Рӯзҳои 13-14-уми феврали соли 2025 бо ташаббуси Комиссияи баиниидоравӣ оид ба муқовимат бо савдои одамон дар шаҳри Кӯлоб семинари омӯзишӣ дар мавзӯи «Муқовимат ба савдои одамон» баргузор гардид.
Семинари омӯзишӣ барои судяҳои Суди шаҳри Кӯлоб ва ноҳияҳои минтақаи мазкур роҳандозӣ гардида, ҳамзамон дар семинари омӯзишӣ намояндагони Созмони байналмилалии муҳоҷират, Созмони амнияти ҳамкории Аврупо, ташкилотҳои ҷамъиятӣ, олимони соҳавии Вазорати корҳои дохилӣ ва Донишгоҳи миллии Тоҷикистон иштирок доштанд.
Қобили зикр аст, ки хариду фурӯши одамон дар миқёси ҷаҳонӣ ҳамчун ҷинояти вазнин ва поймолкунандаи ҳуқуқу озодиҳои инсон, ки дар айни ҳол дар худ унсурҳои таҳдид ба амнияти миллии як қатор давлатҳо ва халалдор намудани суботи иҷтимоию иқтисодии онҳоро ниҳон дорад, эътироф гардидааст.
Дар ҷараёни семинар, санадҳои меъёрии ҳуқуқии танзимкунандаи муқовимат ба савдои одамон ва шаклу усулҳои мубориза бо ин омили номатлуб, муқовимат ба савдои одамон дар заминаи санадҳои байналмилалӣ, айнияткунонии савдои одамон, омилҳои виктимологии пешгирии ҷиноятҳои савдои одамон, принсипҳои муошират бо ҷабрдидагон ва ба ҷавобгарӣ накашидани қурбониёни савдои одамон, хусусиятҳои ҳамкориҳои байналмилалӣ дар муқовимат ба савдои одамон мавриди баррасӣ ва омӯзиш қарор гирифтанд.
Баргузории чунин семинарҳои омӯзишӣ дар дигар шаҳру вилоятҳои ҷумҳурӣ низ ба нақша гирифта шудааст.